Independent Sangram News
ಧಾರವಾಡ : ನಗರದ ಪ್ರತಿಷ್ಠಿತ ರಾಷ್ಟ್ರೀಯ ಶಾಲೆಯಾದ ಕರ್ನಾಟಕ ಪ್ರೌಢಶಾಲೆಯಲ್ಲಿ, 2025-26 ನೇ ಶೈಕ್ಷಣಿಕ ವರ್ಷದ ಕ್ರೀಡಾಹಬ್ಬ ವು ದಿನಾಂಕ: ೨೪-೧೧-೨೦೨೫ ಸೋಮವಾರ ದಂದು ಜರುಗಿತು. ಈ ಕ್ರೀಡಾಹಬ್ಬದ ಉದ್ಘಾಟಕರಾಗಿ ಆಗಮಿಸಿದಂತಹ ಖ್ಯಾತ ಸಾಹಿತಿಗಳು ಹಾಗೂ ದೈಹಿಕ ಶಿಕ್ಷಣ ತಜ್ಞರು ಆದಂತಹ ಸನ್ಮಾನ್ಯ ಶ್ರೀ ಶಿವಾನಂದ ನರಹಟ್ಟಿ ಮಾತನಾಡುತ್ತಾ —
“ಇಂದಿನ ಈ ಉದ್ಘಾಟನಾ ವೇದಿಕೆಯಲ್ಲಿ ನಿಲ್ಲುವುದು ನನಗೆ ದೊಡ್ಡ ಗೌರವ.
ನಾವು ನಡೆಸುತ್ತಿರುವ ಈ ಕ್ರೀಡಾ ಸಮಾರಂಭ—ಕೇವಲ ಒಂದು ಸ್ಪರ್ಧೆಯ ದಿನವಲ್ಲ. ಇದು ನಮ್ಮೆಲ್ಲರ ಆರೋಗ್ಯ ಯಾತ್ರೆಯ ಹಬ್ಬ. ಇಂದಿನ ಮಕ್ಕಳ ಬದುಕಿನಲ್ಲಿ ವ್ಯಾಯಾಮಕ್ಕೆ, ನಿಜವಾದ ಆಟಕ್ಕೆ, ತಾಜಾ ಗಾಳಿಗೆ ಇರುವ ಅವಕಾಶ ತೀರಾ ಕಡಿಮೆ. ಆದರೆ ಆರೋಗ್ಯವೇ ಜೀವನದ ಮೂಲ ಬಂಡವಾಳ ಎಂದು ನಾವು ಮರೆತೇಬಿಟ್ಟಿದ್ದೇವೆ. ಈ ಕಾರಣಕ್ಕೇ ಇಂತಹ ಕಾರ್ಯಕ್ರಮಗಳು ಅತ್ಯಗತ್ಯ. ಮಕ್ಕಳು ಆಟಗಳಲ್ಲಿ ಗೆಲ್ಲುವುದು ಅಥವಾ ಸೋಲುವುದು ಸಹಜ.ಆದರೆ ಆಟಗಳಲ್ಲಿ ಭಾಗವಹಿಸುವುದರಿಂದ ದೊಡ್ಡ ಪ್ರಯೋಜನ ಇದೆ.ಅದೇನೆಂದರೆ ನಿಮ್ಮ ಆರೋಗ್ಯ. ಕ್ರೀಡೆಗಳಿಂದ ಆರೋಗ್ಯ ಬಲವಾಗುತ್ತದೆ,ನಿಮ್ಮ ಮನಸ್ಸು ಚೈತನ್ಯದಿಂದ ತುಂಬುತ್ತದೆ. ವೈದ್ಯರು ಹೇಳುವಂತೆ, ಪ್ರತಿದಿನ 30 ನಿಮಿಷ ವ್ಯಾಯಾಮ ಮಾಡಿದರೆ ರೋಗ ನಿರೋಧಕ ಶಕ್ತಿ ಹೆಚ್ಚುತ್ತದೆ. ತಲೆಮಿಂಚು ಬೆಳೆಯುತ್ತದೆ, ಧ್ಯಾನ ಶಕ್ತಿ ಹೆಚ್ಚುತ್ತದೆ. ಅದರಲ್ಲೂ ನೀವು ಮೈದಾನದಲ್ಲಿ ಕಲಿಯುವ ಶಿಸ್ತು, ಸಮಯ ಪಾಲನೆ, ಒಗ್ಗಟ್ಟು, ಬಿದ್ದು ಎದ್ದುಕೊಳ್ಳುವ ಧೈರ್ಯ ಇವು ಪುಸ್ತಕದಲ್ಲಿ ಸಿಗುವ ಪಾಠಗಳಲ್ಲ.
ಕ್ರೀಡೆ ಮನುಷ್ಯನನ್ನು ಸಂಪೂರ್ಣವಾಗಿಸುತ್ತದೆ. ಒಂದು ಓಟದಲ್ಲಿ ಕೆಲವೇ ಸೆಕೆಂಡುಗಳು ಮಾತ್ರ ಇರುತ್ತವೆ, ಆದರೆ ಆ ಸೆಕೆಂಡುಗಳ ಹಿಂದೆ ದಿನಗಳ, ವಾರಗಳ, ತಿಂಗಳ ಶ್ರಮ ಇರುತ್ತದೆ. ಇದನ್ನೇ ಜೀವನ ಅನ್ನುವರು. ಆರೋಗ್ಯದ ಮೌಲ್ಯವನ್ನು ನಮ್ಮ ವಿದ್ಯಾರ್ಥಿಗಳು ಮೊದಲೇ ಕಲಿಯಬೇಕು. ಕಾರಣ ಆರೋಗ್ಯವಿಲ್ಲದ ಬುದ್ಧಿಶಕ್ತಿ, ಆರೋಗ್ಯವಿಲ್ಲದ ಸಾಧನೆ, ಆರೋಗ್ಯವಿಲ್ಲದ ಕನಸು ಎಲ್ಲವೂ ವ್ಯರ್ಥ.
ಇವತ್ತು ನೀವು ಮೈದಾನಕ್ಕೆ ಕಾಲಿಡುವಾಗ,ಒಂದನ್ನೇ ನೆನಪಿಡಿ: “ನಾನು ನನ್ನ ಆರೋಗ್ಯಕ್ಕಾಗಿ ಓಡುತ್ತಿದ್ದೇನೆ.”ಇದು ಕೇವಲ ಸ್ಪರ್ಧೆಯ ಓಟವಲ್ಲ,ನಮ್ಮ ಭವಿಷ್ಯದತ್ತ ಇರುವ ಓಟ.ನಿಮ್ಮ ದೇಹಕ್ಕೆ ಹೂಡಿದ ಪ್ರತಿಯೊಂದು ಶ್ರಮದ ಹನಿ,ನಿಮ್ಮ ನಾಳೆಯ ದೊಡ್ಡ ಗೆಲುವಿನ ಬೀಜ.
ಆತ್ಮವಿಶ್ವಾಸದಿಂದ ಓಡಿ,ಸಂತೋಷದಿಂದ ಆಡಿರಿ, ಆರೋಗ್ಯವನ್ನು ನಿಮ್ಮ ಜೀವನದ ಮೊದಲ ಗುರುವಾಗಿಡಿರಿ. ಆಟಗಳೊಂದಿಗೆ, ಪಾಠಗಳ ಕಡೆಗೂ ಗಮನ ಕೊಟ್ಟರೆ,ಉಜ್ವಲ ಭವಿಷ್ಯ ನಿಮ್ಮದಾಗುತ್ತದೆ” ಎಂದು ಮಕ್ಕಳಿಗೆ ಉಪದೇಶಿಸಿದರು . ಸಮಾರಂಭದ ಅಧ್ಯಕ್ಷತೆಯನ್ನು ಕೆ ಇ ಬೋರ್ಡಿನ ಕಾರ್ಯಾಧ್ಯಕ್ಷರಾದ ಸನ್ಮಾನ್ಯ ಶ್ರೀ ಶ್ರೀಕಾಂತ ಪಾಟೀಲ ವಹಿಸಿ ಮಾತನಾಡಿ – ವಿದ್ಯಾರ್ಥಿಗಳು ಸಾಮಾಜಿಕ ಜಾಲತಾಣಗಳ ಬಳಕೆಯನ್ನು ಕಡಿಮೆ ಮಾಡಿ, ಹೆಚ್ಚಿನ ಸಮಯವನ್ನು ದೈಹಿಕ ಶ್ರಮ ವಹಿಸಿ ಕೆಲಸ ಮಾಡಬೇಕು. ವಿವಿಧ ದೇಶೀಯ ಆಟಗಳನ್ನು ಮೈಗೂಡಿಸಿಕೊಂಡು ಉತ್ತಮ ಆರೋಗ್ಯ ಕಾಪಾಡಿಕೊಳ್ಳಬೇಕು. ಕಂಪ್ಯೂಟರ್ ಹಾಗೂ ಮೋಬೈಲ್ ಗಳಲ್ಲಿ ಆಟವಾಡದೇ ಆಟದ ಮೈದಾನದಲ್ಲಿ ದೇಹ ದಂಡಿಸಿದರೆ, ಉತ್ತಮ ಆರೋಗ್ಯ ಹೊಂದಲು ಸಾಧ್ಯ.” ಎಂದು ಸಲಹೆ ನೀಡಿದರು. ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಕೆ ಇ ಬೋರ್ಡಿನ ಕ್ರೀಡಾ ಅಭಿವೃದ್ಧಿ ಅಧಿಕಾರಿಗಳಾದ ಸನ್ಮಾನ್ಯ ಶ್ರೀ ವಸಂತ ಮುರುಡೇಶ್ವರ ಅವರು ಮಾತನಾಡಿ – ಕರ್ನಾಟಕ ಪ್ರೌಢ ಶಾಲೆಯ ವಿದ್ಯಾರ್ಥಿಗಳು ರಾಜ್ಯ, ರಾಷ್ಟ್ರ ಹಾಗೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬಾಸ್ಕೇಟ್ ಬಾಲ್ ಹಾಗೂ ಮುಂತಾದ ಕ್ರೀಡೆಗಳಲ್ಲಿ ಭಾಗವಹಿಸಿದ್ದಾರೆ.
ಇಂತಹ ಪುಣ್ಯ ಭೂಮಿಯಲ್ಲಿ ಅಭ್ಯಾಸ ಮಾಡುತ್ತಿದ್ದೀರಿ ಎಂದರೆ, ನೀವೆಲ್ಲರೂ ಅದೃಷ್ಟವಂತರು. ಕ್ರೀಡೆಗಳಲ್ಲಿ ಭಾಗವಹಿಸುವುದರಿಂದ ರಾಜ್ಯ ಹಾಗೂ ರಾಷ್ಟ್ರಮಟ್ಟದ ಸಾಕಷ್ಟು ಅವಕಾಶಗಳು ನಿಮ್ಮನ್ನು ಹುಡುಕಿಕೊಂಡು ಬರುತ್ತವೆ.” ಎಂದು ಮಕ್ಕಳಿಗೆ ಕಿವಿ ಮಾತು ಹೇಳಿದರು. ಸಮಾರಂಭದಲ್ಲಿ ಕರ್ನಾಟಕ ಪ್ರೌಢ ಶಾಲೆಯ ಶಾಲಾ ಸುಧಾರಣಾ ಸಮಿತಿಯ ಅಧ್ಯಕ್ಷರಾದ ಶ್ರೀ ವಿಶ್ವನಾಥ ದೇಶಪಾಂಡೆ, ಆಡಳಿತಾಧಿಕಾರಿಗಳಾದ ಶ್ರೀ ಜಿ ಆರ್ ಭಟ್ ಉಪಸ್ಥಿತರಿದ್ದರು. ಸಮಾರಂಭವು ಪ್ರಾರ್ಥನೆಯೊಂದಿಗೆ ಆರಂಭಗೊಂಡು, ಪ್ರಾಂಶುಪಾಲರಾದ ಶ್ರೀ ಎನ್ ಎನ್ ಸವಣೂರ ಅವರು ಅತಿಥಿಗಳನ್ನು ಸ್ವಾಗತಿಸಿದರು. ಹಿರಿಯ ಶಿಕ್ಷಕರಾದ ಶ್ರೀ ವಿ ಬಿ ಶಿಂಗೆ ಅತಿಥಿಗಳನ್ನು ಪರಿಚಯಿಸಿದರು.
ಧಾರವಾಡ ಶಹರ ದ ವಿವಿಧ ಶಾಲಾ-ಕಾಲೇಜುಗಳ ಪ್ರಾಂಶುಪಾಲರು, ದೈಹಿಕ ಶಿಕ್ಷಣ ಶಿಕ್ಷಕರು, ಪಥಸಂಚಲನದ ನಿರ್ಣಾಯಕರಾಗಿ ಆಗಮಿಸಿದ್ದರು. ಈ ಕಾರ್ಯಕ್ರಮ ವನ್ನು ಶಾಲೆಯ ದೈಹಿಕ ಶಿಕ್ಷಣ ಶಿಕ್ಷಕರಾದ ಶ್ರೀ ಶಿವಪ್ರಕಾಶ ಬೋಂಗಾಳೆ ಅವರು ಸಂಯೋಜಿಸಿದ್ದರು. ಇದೇ ಸಂದರ್ಭದಲ್ಲಿ, ಸಮಸ್ತ ಶಿಕ್ಷಕ/ ಶಿಕ್ಷಕೇತರ ಸಿಬ್ಬಂದಿ ವರ್ಗದವರು,ಶಾಲಾ ಕ್ರೀಡಾ ಮಂತ್ರಿ, ಪ್ರಧಾನ ಮಂತ್ರಿ, ಎನ್ ಸಿ ಸಿ ವಿದ್ಯಾರ್ಥಿಗಳು ಹಾಗೂ ಇತರೆ ವಿದ್ಯಾರ್ಥಿ ವೃಂದ ಉಪಸ್ಥಿತರಿದ್ದು, ಕಾರ್ಯಕ್ರಮ ವನ್ನು ಯಶಸ್ವಿಗೊಳಿಸಿದರು.
